ਪੰਜਾਬ ਬਾਸਮਤੀ ਰਾਈਸ 'ਤੇ ED ਦਾ ਵੱਡਾ ਐਕਸ਼ਨ; ₹350 ਕਰੋੜ ਦੀ ਬੈਂਕ ਧੋਖਾਧੜੀ ਮਾਮਲੇ 'ਚ 6 ਥਾਵਾਂ 'ਤੇ ਛਾਪੇਮਾਰੀ, ਡਾਲਰ ਤੇ ਨਕਦੀ ਬਰਾਮਦ
ਜਲੰਧਰ: ਪ੍ਰਵਰਤਨ ਨਿਰਦੇਸ਼ਾਲਿਆ (ED) ਦੇ ਜਲੰਧਰ ਜ਼ੋਨਲ ਦਫ਼ਤਰ ਵੱਲੋਂ ਅੱਜ ਬੈਂਕ ਧੋਖਾਧੜੀ ਦੇ ਇੱਕ ਵੱਡੇ ਮਾਮਲੇ ਵਿੱਚ ਵੱਡੀ ਕਾਰਵਾਈ ਕੀਤੀ ਗਈ ਹੈ। ਈਡੀ ਨੇ ‘ਮੈਸਰਜ਼ ਪੰਜਾਬ ਬਾਸਮਤੀ ਰਾਈਸ ਲਿਮਟਿਡ’ (PBRL) ਅਤੇ ਇਸ ਦੇ ਡਾਇਰੈਕਟਰਾਂ/ਪ੍ਰਮੋਟਰਾਂ, ਜਿਨ੍ਹਾਂ ਵਿੱਚ ਕੁਲਵਿੰਦਰ ਸਿੰਘ ਮੱਖਣੀ ਅਤੇ ਹੋਰ ਸ਼ਾਮਲ ਹਨ, ਦੇ 06 ਵੱਖ-ਵੱਖ ਵਪਾਰਕ ਅਤੇ ਰਿਹਾਇਸ਼ੀ ਟਿਕਾਣਿਆਂ ‘ਤੇ ਤਲਾਸ਼ੀ ਮੁਹਿੰਮ (Search Operations) ਚਲਾਈ।
ਇਸ ਕੰਪਨੀ ‘ਤੇ ਕੇਨਰਾ ਬੈਂਕ ਦੀ ਅਗਵਾਈ ਵਾਲੇ 6 ਬੈਂਕਾਂ ਦੇ ਸਮੂਹ (Consortium) ਨਾਲ ₹350.84 ਕਰੋੜ ਦੀ ਵੱਡੀ ਧੋਖਾਧੜੀ ਕਰਨ ਦਾ ਆਰੋਪ ਹੈ।
ਜਲੰਧਰ : CBI ਦੀ FIR ਦੇ ਆਧਾਰ ‘ਤੇ ਸ਼ੁਰੂ ਹੋਈ ਜਾਂਚ
ਮਿਲੀ ਜਾਣਕਾਰੀ ਮੁਤਾਬਕ, ਈਡੀ (ED) ਨੇ ਇਹ ਜਾਂਚ ਸੀਬੀਆਈ (CBI), ਨਵੀਂ ਦਿੱਲੀ ਦੁਆਰਾ ਮੈਸਰਜ਼ ਪੰਜਾਬ ਬਾਸਮਤੀ ਰਾਈਸ ਲਿਮਟਿਡ ਅਤੇ ਹੋਰਾਂ ਵਿਰੁੱਧ ਦਰਜ ਕੀਤੀ ਗਈ ਐਫਆਈਆਰ (FIR) ਦੇ ਆਧਾਰ ‘ਤੇ ਸ਼ੁਰੂ ਕੀਤੀ ਹੈ। ਇਹ ਮਾਮਲਾ ਭਾਰਤੀ ਦੰਡਾਵਲੀ (IPC), 1860 ਦੀਆਂ ਵੱਖ-ਵੱਖ ਧਾਰਾਵਾਂ ਅਤੇ ਭ੍ਰਿਸ਼ਟਾਚਾਰ ਨਿਵਾਰਣ ਐਕਟ, 1988 ਦੀ ਧਾਰਾ 13(2) ਅਤੇ 13(1)(d) ਤਹਿਤ ਦਰਜ ਕੀਤਾ ਗਿਆ ਸੀ।
ਕਿਵੇਂ ਕੀਤਾ ਕਰੋੜਾਂ ਦਾ ਘੁਟਾਲਾ?
ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਕੰਪਨੀ ਦੇ ਪ੍ਰਮੋਟਰਾਂ ਅਤੇ ਡਾਇਰੈਕਟਰਾਂ ਨੇ ਜਨਤਕ ਖੇਤਰ ਦੇ ਬੈਂਕਾਂ ਦੇ ਫੰਡਾਂ ਦੀ ਦੁਰਵਰਤੋਂ ਕੀਤੀ ਅਤੇ ਕਰੋੜਾਂ ਰੁਪਏ ਹੋਰ ਪਾਸੇ ਮੋੜ ਕੇ ਨਿੱਜੀ ਲਾਭ ਕਮਾਇਆ।
ਧੋਖਾਧੜੀ ਦਾ ਤਰੀਕਾ: ਆਰੋਪੀਆਂ ਨੇ ਫਰਜ਼ੀ ਸੰਸਥਾਵਾਂ (Fictitious Entities) ਨੂੰ ਸਟਾਕ ਵੇਚਣਾ ਦਿਖਾਇਆ ਅਤੇ ਉਨ੍ਹਾਂ ਨੂੰ ਕਾਗਜ਼ਾਂ ਵਿੱਚ ਦੇਣਦਾਰ (Debtors) ਬਣਾ ਦਿੱਤਾ। ਇਸ ਤੋਂ ਇਲਾਵਾ, ਕੁਝ ਸ਼ੈੱਲ (ਫਰਜ਼ੀ) ਕੰਪਨੀਆਂ ਰਾਹੀਂ ਸਟਾਕ ਵੇਚਿਆ ਗਿਆ ਅਤੇ ਵਿਕਰੀ ਤੋਂ ਆਈ ਰਕਮ ਨੂੰ ਨਕਦ (Cash) ਰੂਪ ਵਿੱਚ ਕਢਵਾ ਲਿਆ ਗਿਆ।
ਰੇਡ ਦੌਰਾਨ ਨਕਦੀ ਅਤੇ ਵਿਦੇਸ਼ੀ ਕਰੰਸੀ ਬਰਾਮਦ
ਈਡੀ ਵੱਲੋਂ ਮਨੀ ਲਾਂਡਰਿੰਗ ਰੋਕੂ ਕਾਨੂੰਨ (PMLA), 2002 ਦੇ ਤਹਿਤ ਕੀਤੀ ਗਈ ਇਸ ਛਾਪੇਮਾਰੀ ਦੌਰਾਨ ਕਈ ਅਹਿਮ ਦਸਤਾਵੇਜ਼ ਅਤੇ ਇਲੈਕਟ੍ਰਾਨਿਕ ਉਪਕਰਣ ਜ਼ਬਤ ਕੀਤੇ ਗਏ ਹਨ। ਇਸ ਤੋਂ ਇਲਾਵਾ ਸਰਚ ਆਪਰੇਸ਼ਨ ਦੌਰਾਨ:
- ₹8.50 ਲੱਖ ਦੀ ਭਾਰਤੀ ਕਰੰਸੀ
- 8,600 ਅਮਰੀਕੀ ਡਾਲਰ (USD) ਬਰਾਮਦ ਕੀਤੇ ਗਏ ਹਨ।
ਈਡੀ ਦੇ ਅਧਿਕਾਰੀਆਂ ਮੁਤਾਬਕ ਇਸ ਮਾਮਲੇ ਦੀ ਅਗਲੇਰੀ ਜਾਂਚ ਤੇਜ਼ੀ ਨਾਲ ਜਾਰੀ ਹੈ ਅਤੇ ਆਉਣ ਵਾਲੇ ਦਿਨਾਂ ਵਿੱਚ ਕੁਝ ਹੋਰ ਵੱਡੇ ਖੁਲਾਸੇ ਹੋਣ ਦੀ ਉਮੀਦ ਹੈ।
About the Author
